اکبر شاہ خاں نجیب آبادی

مصنف “اکبر شاہ خاں نجیب آبادی” کے بارے میں

شناخت: عالم دین، مؤرخ، سیرت نگار، ادیبمولانا اکبر شاہ نجیب آبادی برصغیر کے اُن نامور اہلِ قلم میں شمار ہوتے ہیں جنہوں نے تاریخ، سیرت، معاشرت اور ادب کے میدان میں نمایاں خدمات انجام دیں۔ ان کی تحریروں میں علمی وسعت، تحقیقی دیانت اور سادہ مگر مؤثر اسلوب نمایاں ہے، جس کے باعث وہ اپنے عہد کے معتبر مؤرخین میں شمار کیے جاتے ہیں۔مولانا اکبر شاہ نجیب آبادی 1857 کو نجیب آباد (ضلع بجنور، اتر پردیش) میں پیدا ہوئے۔ ابتدائی تعلیم کے بعد انہوں نے درس و تدریس کے شعبے سے وابستگی اختیار کی اور 1878-79ء کے قریب محکمہ تعلیم میں مدرس کے طور پر خدمات انجام دیں۔ 1906ء اور 1914 ءکے دوران میں قادیان میں قیام کیا اور قادیانیت کے اثر میں آگئے۔ اس دوران ان کا تعلق حکیم نور الدین سے قریبی رہا اور انہوں نے ان کی سوانح عمری "مرقاۃ الیقین فی حیاۃ نور الدین" کا پہلا حصہ بھی تحریر کیا۔ قادیان میں وہ مدرسہ تعلیم الاسلام کے ہاسٹل کے سپرنٹنڈنٹ بھی رہے اور تدریسی خدمات انجام دیتے رہے۔تاہم 1914ء میں حکیم نور الدین کے انتقال کے بعد حالات میں تبدیلی آئی اور مولانا اکبر شاہ نجیب آبادی نے قادیانیت سے اختلاف کرتے ہوئے اسے ترک کر دیا۔ کچھ عرصہ لاہوری گروہ سے وابستہ رہے، مگر جلد ہی اس سے بھی علیحدگی اختیار کر کے مکمل طور پر اسلام کی طرف رجوع کیا۔ اس فکری سفر کے بعد ان کی زندگی کا رخ تحقیق، تصنیف اور دینی و علمی خدمات کی طرف مستقل طور پر متعین ہوگیا۔قادیانیت سے علیحدگی کے بعد انہوں نے پوری یکسوئی کے ساتھ علمی و ادبی کاموں میں حصہ لیا۔ ان کی تصانیف کی تعداد تیس کے قریب ہے، جن میں سب سے نمایاں "تاریخ اسلام" ہے، جو اردو میں تاریخ نویسی کا ایک اہم کارنامہ سمجھی جاتی ہے۔ اس کے علاوہ سیرت نگاری اور اسلامی تاریخ پر ان کی دیگر کتب بھی اہلِ علم میں قدر کی نگاہ سے دیکھی جاتی ہیں۔مولانا اکبر شاہ نجیب آبادی کی تحریروں کو معاصر اہلِ علم، خصوصاً علامہ اقبال جیسے مفکرین کی جانب سے بھی سراہا گیا۔ ان کا اسلوب سادہ، دلنشیں اور عام فہم تھا، جس کے ذریعے انہوں نے علمی موضوعات کو وسیع حلقۂ قارئین تک پہنچایا۔وفات: 10 مئی 1938ء کو نجیب آباد (اتر پردیش) میں انتقال ہوا۔